تعرف أيه عن العواطف يا برعى ! ! !

- يا ترى إزاى تعرف تقيس درجة حبك لحد ؟؟ .. أى حد وتقوله طبعا على الدرجه دى .
- مثلا ...
- تقدر تقولى بتحب والدتك أد أيه ؟؟ مثلا يعنى (ما تخافش هنخش فى الآخر على اللى انتى عايزه بس اصبر لما افهمك )
- ها .. بتحبها قد أيه ؟؟؟ عشرة كيلو والا خمسه متر .. والا ايه بالضبط ؟؟
- طب بلاش ..
- تقدر تقولى لو سئلتك حبيبتك بتحبينى قد أيه يا ( برعى ) .. هتقولها ايه ؟؟
- بس والنبى ما تقوليش قد البحر وسمكاته .. والا قد دموع الحبايب قبلنا .. والحاجات الهبولى دى (بالمناسبه الاجابات اللى من النوع ده بتنم فعلا عن إعاقه زهنيه واضحه من الحبيب وتخلف عقلى مزمن من الحبيبه اللى بتصدق ده)
- انا عارف انك إحترت .. ومش بس كده حسيت بالحماقه ولو شفت نفسك فى المرايه دلوقت حتجيلك لوثه عقليه فعلا من شعرك المنكوش وودانك اللى كبرت فجأه .
- أنا أقولك نصيحه لوجه الله .. بس علشان تكون منطقى وإجابتك حقيقية مش هلس يعنى وأهو على الاقل تثبتلها حبك بصحيح وإنك كمان بتفهم ... لأنها يا حلو هتسأل السؤال ده يعنى هتسأله ولو فرض وما سألتوش يبقى يا إما إنها عارفه قصورك الزهنى وإعاقتك العقليه ومكسوفه تحرجك ، يا إما إنها عارفه إنك هلاس ولعبى ولا بتحبها ولا نيله .
- طبعا إنت عارف (انا بفترض إنك عارف) إن الحب يا أخ (برعى) حالة عاطفيه من غير أى معيار (فوضى يعنى) زى بلد من غير قوانين كل واحد فيها تطلع حاجه فى نافوخه يعملها .. الحب بقى أصعب فى الفوضه شويه لأن الطرفين فيه دماغهم ضاربه ومعظم تصرفاتهم ضد العقل والمنطق .. طبعا كلامى مش عاجبك !!!
- طيب ممكن تقولى الهدايا اللى كل حبيبين بيجيبوها لبعض بتبقى منطقيه ؟؟ خد عندك مثال .. الدباديب و الورود والبرفانات وحاجالت تانيه كتير لو قيستها بميزان المنطق والعقل تحس ان الجماعه دول تقريبا مهبولين او عايزين اعادة تأهيل نفسى .
- لكن بميزان الحب والعواطف تلاقيهم آخر إنسجام وعاقلين ونقول عليهم بيحبوا بعض وده لأن فعلا الحب نفسه من حيث المبدأ بلا قواعد أو حتى منطق ..خد عندك مثلا ....
- تلاقيها هيه جميله ورقيقه وزى النسمه وبنت ناس ومستنيها مستقبل كبير وتقع فى غرام حضرتك اللى هوه الاخ (برعى) اللى كل احلامه ان شرطة المرافق ما تاخدش عربية البمب اللى بيشتغل عليها بالاجره فى المولد .
- ولا تلاقيها زى القمر ليلة تمامه ، وشياكه وعيله ودراسه ويندب فى قلبها حب سيادتك وتخشيلها من غير لا إحم ولا دستور بالشويتين بتوعك وشعرك اللى مكهربه وتقولها ده جيل وتعمل فيها سبع الليل وانت بتنده لهم كل ليله ينورولك نور السلم علشان بتخاف من القطه .. تقوم البت يا ولداه تقول لاهلها .. انا ما اخدش الا ده .. يقولولها معقوله ؟؟ برعى ؟؟ تقول هوه فيه فى الدنيا غير برعى .
- علشان كده ما فيش لا معايير ولا قوانين ولا منطق فى الحب .. الحب كيميا بتحصل للروح .. والروح حاجه غامضه ما فيش حد مهما كان عرف يفسرها ولا ممكن فى يوم حد حيفسرها .. حتى الانبياء .. الروح غامضه (لكن طبعا موجوده ) وما لهاش لا تعريف ولا تفسير .. والحب احد انشطة الروح علشان كده هوه كمان مش مفهوم وغامض تماما .. فا اللى يقولك اى تعريف عن الحب .. من عينة .. الحب عطاء .. الحب تضحيه .. الحب مش عارف ايه .. الحب ابصر ايه .. مدرك ايه .. ولا تصدق .. الحب غير كده خالص .. وما تسألنيش هوه أيه هو انا هعيد الكلام تانى يا برعى ؟؟؟
- طولت عليك ؟؟؟ قول طول ...
- لا يا عم ... إنت طبعا بعد الرغى ده كله هتسألنى عن الموضوع من الاول أقول لحبيبتى ايه لما تسألنى بتحبنى قد أيه ؟؟؟
- شوف يا برعى ... هوه انا لو كنت أعرف مش الاولى أقولها أنا ؟؟
- فعلا برعى

كل سنه وانتى طيبه ... يا مرايتى !!!

- كل سنه وانتى طيبه يا مرايتى .
- وإنت طيب ... عامل ايه ؟؟
- زى ما انتى شايفه ... بالمناسبه انتى شايفه ايه ؟؟؟
- انا شايفه انك مش موجود ... ده انا عرفتك من صوتك بالعافيه .
- عندك حق ... انا فعلا مش أنا .
- أمال إنت مين إبن عمك ؟؟؟
- هتهزرى ... وده وقت هزار ؟؟؟
- أعملك أيه ما أنت إللى بتقول إنك إنت مش إنت .
- أقصد أقولك إنى متغير ... حاسس بكده يعنى .
- آه ... وحاسس بقى إنك إتغيرت إزاى ؟؟؟
- أنا اللى بسألك ... إنتى دايما اللى شايفانى وتقدرى تحكمى .
- أقولك الحق ؟؟؟ أنا مش شايفاك أصلا .
- مش شايفانى ؟؟؟ إزاى ؟؟؟
- أنا سامعاك لكن مش شايفاك .
- الله ؟؟ ما أنا شايف نفسى فيكى أهو ؟؟
- ده بيتهيئلك ... انا مش شايفاك ... إنت ما بقتش موجود .
- إزاى ده ؟؟ ما هو أنا أهو ... شكلى وجسمى ... انا اهو قدامى أهو .
- إنت بس اللى شايف نفسك ... عينيك شايفاك صحيح لكن إنت ما بقتش موجود.
- إنتى بتخرفى تقولى إيه ؟؟؟
- هو أنا عمرى كدبت عليك ؟؟ والله إنت مش موجود ... إنت اللى فاكر كده .
- على فكرة بقى ... أنا جاى أقولك كل سنه وإنتى طيبه لكن إظاهر إنى هكسرك.
- مش هتقدر ... عارف ليه ؟؟؟ لأنك مش موجود ... إنت منتهى ... إنت مش حقيقى ... إنت مزيف !!! ومش عايز تواجه نفسك بده .
- بس بس طب كفايه ، طب وما قلتيش ليه كده من زمان ؟؟؟
- لأنك ما كنتش كده ... ولما حاولت أقولك إنت ما سمعتش .
- أنا دايما كنت بأسمعك .
- أبدا ... إنت عمرك ما سمعت غير صوت نفسك .
- والعمل دلوقت ؟؟
- أبدا ... زيك زى غيرك ... إنت شبح ... ما حدش شايفك ، ممكن تشوفلك ركن وتنسى نفسك فيه .
- برضه كل سنه وإنتى طيبه ... يا مرايتى .

المحطه والقطار

فيه ناس زى المحطه تعدى عليها القطارات ... و القطر مهما وقف لازم يمشى من المحطه .... و القطر اللى يفضل فى المحطه يبقى عطل ... يبقى انتهى .... يبقى فشل .... يبقى هيكهنوه
المحطة قاعده والقطر فات وعدى .... لكن القطر سريع ... ساعات المحطه بتحاول تعطله وتخليه موجود اكتر وقت ممكن ..... ودى انانية بجد .... لكن والله غصب عنها .... والله ما كانش قصدها تعطل القطرعلشان يبقى متعطل بقدر ما كانت نفسها تكون زيه قطر ...
المحطه من يوم ما شافت القطر وهيه نفسها تبقى قطر ... فى سرعته وطموحه وشبابه وحماسه .... المحطه قديمه .... جدا .... ومتهالكه ومتصدعه وما عادش ينفع فيها اصلاح ولا دهانات ... ما فيش فايده ... المحطه قدمت جدا .... قدمت لدرجه ما ينفعش تستقبل قطارات تانى .... ولو حصل تبقى قطارات عطلانه ... كهنه ... متهالكه زى المحطه
المهم ... سيبنا من المحطه وخلينا فى القطر و فى طريقه .... قدامه السكه مفتوحه على الاخر ... والطريق مليان محطات جديده وقويه يقدر ينقى المحطه اللى تعجبه .... على مزاجه .... والقطار سريع وقوى وما فيش حاجه هتقدر توقفه .... و لما القطار وقف شويه فى المحطه اياها عطله... القطر نفسه قال كده ... يعنى لما مشى هوه اللى كسبان
.... المحطه ... يعنى .... ما سكه نفسها واهى قاعده بتتفرج على قطر رايح وقطر جاى وهى ماشيه
وبعدين ... الحمد لله ان القطر مشى قبل الهدد ما يحصل ويلاقى عاليها واطيها ... اصل باسم الله ما شاء الله المصائب عادة لا تاتى فرادى .... زى ما هو ما بيحص دايما... والحمد لله ان القطر مشى قبل الانهيار اللى بيحصل .... وسيبنا بقى من الكبر بقى والكرامه وكده ... والكلام اللى من عينة ده المحطه هتطلع من تحت الانقاض .. والكلام الاهبل ده .... لا

أسد أنانى عجوز وغزاله حظها كده ...

- ده ايه الزهق ده انا خلاص اتخنقت
- ياااااه دى السكه طويله بشكل ... ايه الملل ده ؟
- فعلا وإظاهر إن القطر ده بعافيه شويه ده ناقص يقف للى يشاورله .
- هنعمل ايه بقى ادينا ركبناه وخلاص.
- طب ما تيجى نتكلم شويه ده احنا بقالنا كتير ما اتكلمناش مع بعض .
- الله ؟؟ هو انت تعرفنى يا اخينا ؟؟
- طبعا ... مش انت اللى لسه راكب من محطتين .
- ايوه صحيح والله ما انا واخد بالى .. وانت ازيك كده .
- عال الحمد لله بس فيه حكايه كده شاغله بالى حبتين .
- خير يا اخويا قول فضفض ده احنا مالناش غير بعض برضه .
- أصل أنا عقبال أمالتك بشتغل فى جنينة الحيوانات .
- والله ؟؟؟ دى شغله مسليه جدا .
- مسلية ايه ؟؟ ده انا ما بنامش بسببها وعقلى مشغول منها .
- ليه كفى الله الشر .
- يا اخى كان عندنا اسد عجوز حبتين كان طول النهار قاعد مالوش لا شغله ولامشغله.
- طب وده ماله ده ما الجناين ياما فيها اسود عجوزه .
- اصبر بس .. بعد شويه جابولنا غزاله جديده حطوها فى القفص اللى قدامه .
- عال قوى بقيت جيرة حلوه برضه .
- بقولك اصبر .. لقينالك حال الاسد اتشقلب وبعد ما كان مدهول فى نفسه وعامل زى اللى مستنى قضاه لقيناهولك بيروق نفسه وبقى عايق على الآخر ورجع ييجى 20 سنه لورا .
- طب ما ده كويس أهو بقى ينفعكو للفرجه بدل قعدته .
- يا عم اصبر .. شويتين والغزاله عجبها منظر الاسد اللى قعد يبسبس لها وهاتك يا كلام يدوخ لغاية ما الغزاله وقعت فى غرامه .
- يا انهار اسود ... بجد ؟؟ وبعدين ؟؟
- قعدوا على كده كتير ؟؟ قول ييجى اربع سنين .. وكل اللى رايح وجاى يقولولنا : الله ؟؟ ما تجوزوا الاسد للغزاله .
- طب وما جوزتهومش ليه ؟؟
- تصدق انت طلعت اغبى من الحمار الوحشى اللى عندنا ؟؟؟
- ليه بس الغلط ده ؟؟؟
- إنت عتعمل زيه ؟؟ ماهو الاسد راخر إفتكر إنه ممكن وعمل فيها غزال .. تصدق ؟؟
- لا والله ؟؟؟ الاسد عمل غزال ؟؟
- آه وحياة ربنا ... لأ وايه .. عاش فى دور الغزال ياكل اكله ويلبس لبسه ... كل ده ماشى لكن المصيبه ان الغزاله إفتكرته مع الوقت غزال .
- يا ليله مش فايته .
- قعدنا نقول للغزاله يا ستى يهديكى .. يرضيكى ... ده والله أسد .. وعجوز كمان .. ده اللى عامله ده شوية الوان بيضحك على نفسه بيهم .. ابدا .. الله يهديكى ده يخلفك .. ابدا .. راسها وألف جزمه قديمه إنه غزال من ضهر غزال .
- وبعدين ؟؟ إنت شوقتنى .
- فوتك فى الكلام كان الاسد له شبلين كبروا مع الوقت قمنا جوزنا واحد منهم لما لقيناه كبر على الجواز واللى جوزناه ده فى عمر الغزاله .
- يا راجل قدها يعنى ؟؟
- ايوه ... ومن يومين بنفتح على الاسد لقينا حاله بقى حال ... عمال يدور ويلف فى القفص ويبص على الاسود الصغيرة فى الاقفاص التانيه وقعد يزوم عليها لما لقاها كلها بترسم على غزالته .
- وطبعا الغزاله عينيها شايفه الاسود الصغيره التانيه ؟؟
- طبعا .. لقينالك الاسد العجوز ده رجع شكله ييجى مية سنه لقدام وعنيه رايحه ما بين الغزاله وما بين النمور والاسود الصغيره .. وبطل ياكل ويشرب لما خلانا كلنا فى الجنينه زعلانين عليه .
- طب والغزاله عملت ايه ؟؟
- ابدا .. قعدت تشاور لده وتسمع بصبصة ده وتكلم ده ... الطبيعى يعنى .
- وتفتكر الاسد العجوز واخد باله ؟
- طبعا ... ده زى ما يكون بنى آدم زينا وفاهم .. ده زى ما يكون كان حاسس انه انانى.
- طب ما هو انانى فعلا ... هو فيه اسد فى سنه ده يتجوز غزاله فى السن ده ؟؟
- يا أخى ما تظلموش ... هو يعنى كان كفر ... واللى كان بأيده .
- على رأيك ... أهو كل واحد بياخد نصيبه .
- ده صعبان عليه قوى علشان كده قطعت الاجازة مخصوص علشانه ونزلت من البلد وهروح طوالى على الجنينه .
- جنينة ايه ؟؟
- جنينة الحيوانات ؟؟؟
- اللى فى الجيزه ؟
- ايوه
- دى محطة الجيزه فاتت يا اخينا ده احنا داخلين على المنيا .
- يا انهار ابوك اسود .. عاجبك كده .. هرجع ازاى دلوقت .. انا نازل هنا .. سلام
- طب ما تنساش تسلم لنا على الاسد ... اما راجل حمار بصحيح !!!

فاكر زماااااااان لما كنا بنى آدمين ؟؟؟

إيه الزحمه دى ؟؟ يا ساتر يا رب .. وإيه الريحه دى ؟؟ أتوبيس ده والا علبة كشرى ... يا عم إنت حوش التقليه اللى على راسى دى ... يوووووه الواحد إتخنق .. ما فيش حد يقعدنى جنب الشباك ؟؟ ..

- أهلاااااان صلاح إزيك ... فينك يا راجل ؟؟ الله ؟ إنت مش فاكرنى وألا ايه ؟؟ انا حبيبك بتاع زمان خدنى جنبك يا راجل ... ياااااااه على الصدف الجميله .
- أهلا أهلا أهلا والله زمان معلش بقى العتب ع النظر أهلا أهلا تعالى جنبى تعالى .
- أزيك يا صلاح ده ايه يا راجل الغيبه الطويله دى ؟
- والله مشاغل هنعمل ايه فى الدنيا وهمها اللى بعدتنا عن الاحباب والله زمان .
- فاكر ؟؟ فاكر يا صلاح زمااان لما كنا بنى آدمين ؟؟ فاكر .
- يااااه دى حاجه من زمان قوى دى بقالها ييجى خمسه وعشرين سنه وزياده لهو انت لسه فاكر؟؟ .. ما شاء الله ذاكرتك عال .
- تفتكر يا صلاح الايام دى ... يا سلام ... لما كنا بنعدى الشارع والعسكرى يوقف المرور علشانا ويعدينا ونمسك فى ايديه وكنت تقول لأبوك إنك لما تكبر هتطلع عسكرى .
- دى كانت دنيا الله يرحم الايام دى .. فاكر انت لما كنا بنقول على اللى ياخد درس خصوصى انه غبى واللى يوديه اهله مدرسه خاصه يبقى فاشل .. فاكر ؟؟
- آه والله على رأيك يا صلاح والا لما كان ييجى يوم الجمعه وننزل مع العيال ننضف الشارع وكل بيت يرش ميه اللى من البلكونه واللى من الشباك وتهل بقى نسمة الصيف مع كلام الست .
- إلا بقى لما كانت الناس تتخانق مع بعضها ويعوروا بعض تلاقى اللى ضرب يشيل المضروب ويجرى بيه على المستشفى ويمكن كان يديله دمه كمان .
- كمان يا صلاح ده كان الظباط فى القسم يعملوا قعدة عرب ويصالحوا ده على ده ويرجعوا كلهم سمن على عسل .. ايام يا صلاح وراحت كنا وقتها بنى آدمين .
- على رأيك كنا بنى آدمين بصحيح كانت الواحده من دول تمشى فى الشارع ما فيش حد يرفع عينيه فيها وإن حصل وعاكس يوووووه تلاقى ألف قلم على خلقته .
- تعرف انا من يومين كده رحت إدارة الحى اللى جنبنا ما انته عارفه علشان افتح شباك على المنور وانت عارفنى بقى يا ابو الصلح احب امشى دوغرى قدمت طلب فى طلب فى استعجال علشان يدونى تصريح للشباك وشهرين يا بو صلاح وانا دايخ لحد ما شار عليه واحد منهم اهرش قمت هرشت .
- وعملت ايه ادولك التصريح ؟؟
- أبدا رحت لدكتور الجلديه ادانى مرهم ووحياتك يا بو الصلح بحط منه لحد دلوقت
- بتحط المرهم على الشباك ؟؟
- شباك ايه يا بو صلاح ؟؟ هحط المرهم على الشباك ؟؟... هو انت لسه غبى برضه .. من يومك يا اخى .
- يا عم شباك ايه اللى هيدخلك بلاوى هو فيه احلى من هوا النيل والتمشيه عليه ؟؟
- نيل ايه يا صلاح هو انت كنت ميت والا ايه ده انت لو حبيت تمشى على النيل عشر دقايق بس هترجع يا معلم يا على نقاله يا على القسم ده انت تلاقى بتوع الورد والصاقع والمراكب ده حتى المخبرين بياخدوا منك ... يا راااجل نيل ايه جتك نيله .
- الله انت بتشتم ليه ؟؟
- معلش يا صلاح ما انا بحاول افكرك لما كنا بنى آدمين وانت مش عايز تفتكر أصلك من يومك غبى .
- والله بحاول لكن ذاكرتى مش جايبه كل اللى بفتكره انى خلاص نسيت ابقى بنى آدم .
- مش مهم بقى وأنت عامل ايه يا صلاح وأزاى أولادك ؟؟
- أولادى آآآآه كويسين ... إيه ؟؟ أولادى أيه أنا ما عنديش أولاد ... أيه ده ؟؟ ده انا ما اتجوزتش من اصله ... الله ... أنا ما إسميش صلاح ... قوم يا جدع إنت من جنبى .. غور .. ده ايه تلاقيح الجيتت دى .. طب والله ما أنا لابس البنطلون .

( أنا أكتب ... يبقى أكيد أنا حى ... ولو إنى مش متأكد ... لكن هكتب ... لأنى بكتب لنفسى مش لحد ... بكتب علشان أفضل صاحى ... بخاف أنام لحسن أموت وأنا نايم أو حد ييجى ياخد حريتى منى ... أصلى أنا من يومى .... حر )

انا ابكم - احمد مطر

الأبكم
أيها الناس اتقو نار جهنم،
لا تسيؤو الظن بالوالي،
فسوء الظن في الشرع محرم،
أيها الناس أنا في كل أحوالي سعيد ومنعم،
ليس لي في الدرب سفاح، ولا في البيت مأتم،
ودمي غير مباح ، وفمي غير مكمم،
فإذا لم أتكلم
لا تشيعوا أن للوالي يداً في حبس صوتي،
بل أنا ياناس أبكم؛
.قلت ما أعلمه عن حالتي، والله أعلم

لو ربنا كان خلقك حاجه تانيه كنت تبقى ايه ؟؟؟

كل واحد وله طباعه وصفاته وكتير من المخلوقات لها نفس الصفات او على الاقل بتبقى مشهورة بيها ... وده بالمناسبه لعب صحيح وشكله كده هيافه لكن على مهلك شويه وركز معايا .... انا بحاول اوسع افقك وخيالك المصدى .. تعالى افهمك .
مثلا لو ليك صاحب لئيم شويه وتفكر كده لو كان حيوان كان يبقى ايه ؟؟؟ هتقول تعلب ... طب لو نبات ؟؟؟ هتقول كرنب ... طب لو كلمه ؟؟؟ هتقول شتيمه ... طب لو فاكهه ؟؟؟ هتقول حرنكش .... طب لو مشروب ؟؟؟ هتقول جنزبيل ... طب لو طير ؟؟؟ هتقول غراب ........ وهكذا على كل حاجه وعلى اى حد كويس او وحش
ايه رايكم ؟؟ لعبه حلوه مش كده ؟؟؟؟؟

واحد وطن وصلحه !!.. والا اقولك ولعه

بناء على إلحاح الجماهير (بالمناسبه الجماهير دول واحده بس حتى راحت هيه كمان) ما علينا ... بقى واحد وطن وصلحه ده كان عنوان مقالاتى المستمر وهو كان عبارة عن واحد قاعد فى قهوة وبدل ما يطلب واحد شاى كان ببساطه بيطلب واحد وطن (وشوف التغفيل بقى) آل كمان كان عايز واحد وطن ويصلحه كمان ... مش اى وطن .. يعنى وطن مضبوط على مقاسه يعنى وعلى مزاجه (تغفيل صحيح) ما علينا انا كنت بفكر اسمى عنوان المقال بعد كده : واحد وطن وولعه .... متهيئلى انسب فى الظروف دى .. والا ايه ؟؟؟؟
يعنى احط رجل على رجل وبكل ألاطه أسقف سقفتين بهواتى وأقول :
جرسووووووون .. إنت يا ولد ... واحد وطن وولعلى فيه كويس ... إغليه على الآخر ... فاهم ؟؟
يقوم اللى جانبى (بيه زيي برضه من اللى لابسين البدله على الشبشب) يقولى :
- طب يا إكسلانس (آل أنا يعنى الاكسلانس ده - طبعا راجل مغفل) وعايزه يولعلك الوطن اللى انت عايزه ويغليهولك ليه ؟؟
قلت - شوف يا مون بيه (آل هو يعنى المون بيه ده مع إن ريحة شرابه ما تطاقش) المشروبات اليومين دول ما تضمنش وخصوصا مشروب الوطن .
قال - يا إكسلانس (تانى الغبى) مهما تولع فيه او تغليه ما فيش فايده برضه هيفضل الفيروسات والسموم فيه صدقنى .
قلت - لالالالا يا مون بيه (علشان تكمل الغباوة) أنا مش معاك خالص لان لو الولد عرف يولع فيه ويغليه كويس الفيروسات هتهرب والسموم هتموت .
قال - إسمحلى يا إكسلانس (الله يخرب بيتك .... تانى إكسلانس ؟؟) مش هيقدر الولد يولع فيه وعلشان كده مش هيغليه .. صدقنى النار ضعيفه وصاحب القهوة عامل حسابه كل ما تيجى النار تقوى يضعفها ويطفيها ساعات كمان .
قلت - عندك حق يا مون بيه ( انا اقصد يا مون زفت لكن انكسفت اقوله) الراجل صاحب القهوة عامل حسابه على كل حاجه وكل ما نقول خلاص اهو الولعه بتزيد والواد الجرسون هيعرف يغلى الوطن يقوم المعلم صاحب القهوة مطفيها ... بس أهو بنحاول .
قال - طب وانت يا اكسلانس ( ما فيش فايده فى الراجل الغبى ده) ما بتحاولش تغليه انت ليه ؟؟؟
قلت - والله يا مون بيه (انا خلاص مش طايق ريحته... هرجع) انا ياما حاولت ولسه بحاول وكان أملى فى واد جرسون كده ملبسينه عسكرى قلت ما فيش غيره هيغليه ويولع لنا فيه لانه معاه سلاحه ومنننا وعلينا .. لكن يا خسارة واحد عسكرى جابوه من زمان مش فاكر اسمه ابو حاجه .. ابو حمامه .. ابو زرافه ... مش فاكر... المهم الراجل ده مسك الواد دهوه العسكرى قام منجره ومهيئه ومغرقه فلوس ومناصب وخلاه يخلع مننا ومن ساعتها وانا مش شايف حد ينفع يغليلنا الوطن ويظبطه .
قال - يعنى يا اكسلانس (تانى إكسلانس؟؟ يخرب بيت ابوك) ما فيش فايده هنفضل نشرب وطنا كده بجراثيمه وتعابينه وسمومه ؟؟
قلت - لا وشرفك يا مون بيه (دورت وشيي الناحيه التانيه لانى فعلا برجع لانه حط رجل على رجل المعفن) أنا مراهن على العيال اللى بيدخلوا على النيت من كل باب .. العيال دول فاهمين وعارفين ازاى يولعو فيه لكن ناقصهم ترتيب بس.. وهتشوف
قال - طب بقولك ايه يا اكسلانس (انا روحى طلعت منه ) تفتكر العيال دول يتجمعوا ازاى ؟؟؟
قلت - بقولك ايه بقى يا مون نيله انته غور فى داهيه وشوفلنا حد يدفع الحساب .. قرفتنى جتك الفرف

شخص (مخروم) الافق

كلنا نعرف الاشخاص واسعى الافق ، وكمان نعرف ضيقى الافق ... واللى نعرفه طبعا إن الشخص واسع الافق هو شخص يتسم بنظرة عميقة للأمور كما أنه يضع حلولا غير تقليدية للكثير من المشكلات بالاضافه الى انه شخص مبدع على وجه العموم أما ذلك الشخص ضيق الافق فهو فى العموم ايضا عكس ذلك إذ يرى الامور بسطحية شديده ولديه بلاده تحسده عليها السلحفاة ... كل ده إحنا كلنا عارفينه .
أما الاكتشاف الذى أتصور أنى إنفردت به دون خلق الله أنى إكتشفت أنواع أخرى للبشر فيما يخص الافق (أو الخيال لو صح التعبير)
- العبد الفقير الى الله (أنا طبعا) إكتشف نوعين جديدين أحدهم ينطبق عليه أنا شخصيا بشدة وهما :
أولا : شخص مخروم الافق (جديده دى مش كده؟؟ ) .... وثانيا : شخص مسدود الافق (ودى والله أجدد صح ؟؟؟)
نشرح بقى ...
أولا الشخص المخروم (من غير ما حد يفهم غلط - مخروم الافق يعنى) ... ومخروم الافق هو شخص خرم الافق عنده كبر على الآخر حتى ان حلوله الغير تقليدية للمشكلات أصبحت تطول كل شىء تقع عليه عيناه او يذكره عقله ولو على سبيل المصادفة ولا تربطه بتلك المشكله اى علاقة من اى نوع فمثلا لما ييجى على باله غياب رجال المرور عن الاشارات وتقاعسهم عن اداء مهامهم يضع حلا غريبا إذ يقترح (بينه وبين نفسه طبعا) أن يصنعوا اكشاكا من البلاستيك يضعوها فى كافة الاشارات لها زجاج فيميه ويضعوا من وراء الزجاج صورة لشرطى يقظ لا يتبين الراكب ملامحه فيحسبه شرطى حقيقى فيلتزم بإشارة المرور وفى الحقيقة لا احد بداخل الكشك .... ده مثلا ... او يصنعوا لرئيس الحكومة نموزجا على برنامج الجرافكز ليضعوه امام الناس فى قناة خاصة يظل يردد اقوالا عن حلول حاسمة لكل المشكلات وفى الحقيقة هو يستمتع بهواء البحر فى مارينا ومعه افراد حكومته والتابعين والمخلصين - الى يوم الدين - ... ده مثلا برضه ... أو يعدوا حربا ضارية (سنيمائية طبعا) على اسرائيل نظل نشاهدها لاعوام واعوام ونحن نصفق لجنودنا البواسل ... وطبعا ما فيش حاجه من دى بتحصل ولا هتحصل .. او مثلا ... يفبركوا نجاجنا فى إنشاء مفاعل نووى هو الاول من نوعه لا يعتمد على الماء الثقيل او اليورانيوم المخصب إنما يعتمد على البرسيم وممكن نزود الحبكه ان اسرائيل وامريكا عايزه تضرب المفاعل المزعوم حماية لحق الحمير فى الغذاء .... وهكذا يضع الشخص مخروم الافق حلولا غريبه لاشياء لا علاقة له به اللهم يريد ان يفوت على الشعب غريب الاطوار فرصة كراهية حكامه من باب نكران الجميل ... وعلشان كده تلاقى الشخص مخروم الافق خياله بيشر ويخر حلول على الفاضيه والمليانه وبالمناسبه ... كنت اعرف واحد كان رئيس حزب (من الاحزاب الورقية اياها وكنت قريب الصلة بيه جدا لدرجه كلن عايزنى نائب له ) المهم الشخص ده كان اول شخص مخروم الافق اعرفه فى حياتى (مش عارف افتكرته ليه دلوقت بالذات) المهم الراجل ده من كتر وسع خرمه (من غير ما نفهم غلط تانى - خرم الافق هه؟؟) اقترح عليه مره انه نفسه يستولى على نظام الحكم واول حلجه طبعا لازم يستولى عليها الاذاعة والتلفزيون - واقترح انه يعمل عند اى حداد كويس وامين شوية اقماع حديد ( آه والله العظيم أقماع حديد) وليها خرمين يشوف منهم ويدخل بيهم الاذاعة والتلفزيون ويستولى عليها .... تصوروا ؟؟؟؟؟؟ ده كان اكبر خرم شفته فى حياتى .... ما علينا
نيجى بقى للتانى وهو الشخص مسدود الافق .. وده مالوش دعوة بضيق الافق نهائيا لان ضيق الافق يرى الامور بسطحيه ... ده بقى مش بيشوف اى امور ... عايش كده زى الطوبه لا بيشوف حاجه ولا حتى عايز يشوف حاجه ولا قريب حتى هيشوف حاجه .. يقولك يا عم العيال عايزين ناكلهم ونعلمهم ... وطبعا لهو عارف ياكلهم ولا يعلمهم ولا حتى يخلفهم من اصله ... لانه بعيد عنكم مسدود على الاخر..
- وكده طبعا عبقريتى اكتشفت نظريتان جديدتان (بفكر اسجلهم فى اكاديمية البحث العلمى) ظهور نوعين جديدين من الاشخاص غير واسع وضيق الافق وهما مخروم الافق ومسدود الافق .
انا قلت ان فيه واحد منهم بينطبق عليه (اظن كده) هسيبكم بقى تحذروا أيهما ينطبق عليه ....؟؟؟؟؟؟

الانسان كان أصله بطيخه

ده مش تريقه لا سمح الله ولا كلام القرد اللى بيوسوسلى (سبق وذكرت ان اللى بيوسوسلى قرد مش شيطان زى كل الناس) لأن الاخ دارون زعل مننا الاخوة القرود وآل أيه الانسان أصله قرد وهاتك يا تخاريف من عينة نظرية التطور والهبل ده اللى دفع الاخ قرد يردد بتعالى (هو انت تطول تبقى قرد) - ما علينا - الحكايه يا جماعه بجد مش هزار ... طب هحكيهالكم من الاول :
كان يا ما كان يا سعد (يا عوضين يا محمدين ) يا إكرام - مش عارف انهى فيهم بالضبط - المهم - كان فيه راجل كبير وعظيم كلن اسمه يوسف عملوه والى ، والراجل من عبقريته طلعلنا نظريه بتقول ان الانسان كان اصله بطيخه - حد يصدق كده - طب استنى عليه وانت تصدق ، عم يوسف اللى هوه والى الزمان ده كان عنده عزب واطيان وارثها عن امه اليهوديه وفين بقى ؟؟؟ فى مسقط رأسه فى الفيوم ، وهوووووووووب الراجل صحى من النوم لقى نفسه اسمه يوسف وكمان بقى والى وكمان من الفيوم قام قال لنفسه اعمل زى سيدنا يوسف وظروفه تقريبا زى ظروفى وبرضه فى الفيوم وبرضه عملوه والى .... بس الراجل كان ماشاء الله يحب يكون جديد فى كل حاجه فطلعت فى دماغه ان الانسان كان اصله بطيخه والبطيخه اصلها كنتالوب .... قام هووووووووووب ومطلع قرار يمنع زراعة القمح وياله كله يزرع كنتالوب ومش اى كنتالوب ..... لألألألأ ده كنتالوب من بتاع اسم الله عليهم ولاد خالته حبايبنا اليهود يعنى ... ويسألوه طب يا سيادة الوالى حنطحن ايه نعمله عيش ؟؟؟ يقولهم انتم جربتم كل حاجه من اول عيش القمح والدره والشعير لغاية عيش الصويا طب ما تجربوا تطحنوا لب الكنتالوب وتعملوه عيش ... وعانها والبلد كلها بقت تزرع اسم الله على مقامك الكنتالوب ..وبقت الناس تاكله وتشريه وتطحنه ويروى انهم كانوا بحشوه كمان ... ما علينا ... بعد شوية سنين كده بطلت الناس تزرع اى حاجه غير الكنتالوب حتى الستات الحوامل من كتر اكلهم ليه بقوا يحملوا فى الكنتالوب وعاش الشعب فى سعاده وما عدش حد يعرف حاجه غيره .. وبعد شويتين كده شالوا الوالى وحطوا واحد تانى الراجل يدور على اى حاجه غير الكنتالوب مش لاقى ... قام راخر استسلم للنظريه العبقرية ان الانسان كان اصله بطيخه وبعوامل التطور بقى كنتالوبايه ... عرفتوا بقى قيمة السيد يوسف والى .. هه ؟؟؟ يا شعب ارعن مش عارف مصلحته ... يا شعب ما يحفظش الجميل .. كنتم عملته ايه بقى لو ما كانش سيدكم يوسف افندى والى زرع مصر بالكنتالوب ... كنتم هتقابلوا ربنا تقولولو ايه .. كن بنزرع قمح .... اخص عليكم شعب ناكر للجميل

حتى الحديدة يا راجل

بكل اسف اختفت من قاموس مفرداتنا اللفظية جمل (أكسبريشن يعنى) كنا متعودين عليه ، كلام كتير اختفى ، لكن اهم تعبير كنا متعودين عليه كان : إننا لما بنكون مفلسين كنا بنقول (يا عم انا على الحديده) وطبعا التعبير ده كان قبل العصر العزى (نسبه للأخ المهندس الاشوس المستثمر السياسى الفذ العبقرى الذى لا يشق له غبار السيد عز بك ) والذى يشهد له انه قد استولى على كل الحديد (حتى الحديده اياها اللى كنا بنوصف بيها فلسنا) وتحولت المقوله الى سراب لانه من غير المعقول ان اصف شيئا انا عليه وهو ليس موجودا فى الاساس ، لكن فيه حاجه ايجابيه تانيه فى الموضوع (لاحظ انه علينا النظر فى النصف الممتلىء من الكوب) - بالمناسبه برضه ده كوب عز لان الراجل كتر خيره له مآثر كثيرة من أول أنا من زمان هنا بتاعت الاعلان اياه اللى صدعنا منه واللى بيقدم بيه الرشوه المقنعه للتلفزيون لغاية اعلاناته انه يا عينى مظلوم وما لوش زنب - مش مهم - المهم هنا الحاجه الايجابية التى حدثت على ارض المحروسه مؤخرا ان هناك العديد من السائحين الهنود يتوافدون حاليا على مصر فى ظاهرة غير مسبوقه ... تعرفوا ليه ؟؟
لأن كتير منهم اتضح انهم من المتدينين بعقيدة السيخ ... والراجل عز الله يستره وضع اسياخ الحديد فى مكانه مرموقه مما دفع الهنود السيخ للإقبال على زيارة معبد السيخ الاول فى مصر والعالم العربى والمسمى خطئا (شركة عز الدخيله) وسمعت والعهده على القرد اللى وسوسلى بالكلام ده (بالمناسبه كل واحد له شيطان يوسوسله انا بقى مختلف انا عندى قرد بيوسوسلى - طبعا واضح هوه ليه قرد ) إنهم بيعدوا لاحتفال كبير يشتروا فيه العديد من اطنان عز النادرة وهيهدوا لكل مصرى سيخ
لا ارانا الله مكروها فى سيخ لديكم